點樣踢走暗瘡 (醫生篇)

暗瘡真係令人好煩惱, 尤其係佢無啦啦嚟突襲你, 真係一d還手之力都冇. 我曾經試過同暗瘡苦戰4年之久...重要係嚴重果隻!!! 那段時期塊面真係慘不忍睹.

青春期嘅時候皮膚屬混合性, 膚質唔好但都唔差, 不過到20歲左右塊面變到好油, 重一發不可收恰咁爆瘡, 全部都係大大粒好痛果隻, 未好返又再出, 出咗好耐都唔退, 又多"la".  那時真係好depressed, 最怕係個個見到你話"皮膚差咗喎, 唔夠瞓呀", "d暗瘡好勁喎", "點解好似又差咗嘅", "係咪食得熱氣野多呀"...成日唔想見人. 睇返果時d相, 真係唔認得自己!!!

左圖: 第一次睇下文提及嘅皮膚醫生二影嘅, 唔係最嚴重嘅時期.

我並非素顏, 搽哂粉同concealer, 不過都遮唔到爛面.

右圖: 宜家雖然唔係皮光肉滑, 但起碼唔化妝都唔會嚇人.

4年入面我都有睇醫生, 等我總結一下醫暗瘡嘅過程:

1. 食抗生素: 食咗一個療程, 約4個月. 呢個係治標唔治本嘅方法, 因為淨係有消炎作用, 根治唔到. 不過抗生素對我零作用, 一d都冇好到.

2. 食避孕藥Diane35: 呢隻避孕藥抗雄激素, 好多人試過都有效, 我食咗半年, 又係全無作用.

3. 中醫: 睇咗2年共3個醫生, 雖然長時間但諗住中醫可調理身體, 戒哂口點知都唔work.

中醫一 (屋企附近嘅街坊中醫) - 醫生話我身體差, 貧血, 所以誘發咗暗瘡出嚟, 要食d補嘅藥 (呢個reason真係第一次聽). 食咗藥9個月, 抵抗力好咗好多, 少咗好多傷風感冒, 但暗瘡依舊.

中醫二 (浸大中醫) - 壹週講到個醫生好勁, 一定要試啦. 佢係中藥 + 針灸雙管齊下, 幾十支針咭係面度, 頭頂都有, 重俾埋中藥面膜. 好貴, 成$200幾一次, 但睇咗一段時間, 朋友竟然話我多咗暗瘡!

中醫三 (港大中醫) - 睇咗年幾中醫都唔好, 再試埋最後呢個啦...都睇咗幾個月, 又係一樣.

4. 皮膚醫生: 好hopeless的情況下終於又要回歸西醫

醫生一 - 個醫生好出名醫暗瘡, 所以那時好多人排隊要排到出門口我都堅持去睇. 佢開抗生素同一支粉紅色mask, 又叫你買某隻洗面同埋暗瘡水. 究竟我d暗瘡點解咁頑強, 完全冇料到.

醫生二 - 就係呢個醫生令我好返...其實我唔應該話係個醫生, 係d藥先啱. 佢開俾我嘅暗瘡藥係roaccutane保膚靈. Roaccutane將所有油脂線收哂, 令油脂唔會堵塞毛孔, 毛囊冇機會發炎. 一早已知有呢隻藥, 但d副作用實在令人卻步, 包括: 容易曬傷, 傷肝 (要定期驗血及不可飲酒), 生育有1/4機會生畸胎 (食藥時期懷孕), 抑鬱症致自殺傾向.    

當時出咗暗瘡都3年幾, 一路冇好轉, 所以決定食Roaccutane, 食之前要簽紙, 好誇張. Dosage要睇體重, 我食20mg約大半年. 隻藥簡直係仙丹, 食咗3星期就退哂暗瘡 (睇上圖就知當時d暗瘡有幾嚴重), 到2個月到就連"la"都冇, 好犀利. 好幸運冇咩副作用喺我身上發生, 冇抑鬱重好開心添, 因為好得好快, 皮膚冇油但唔乾, 用所有skincare/cosmetics都好好效果. 但有d人會食到皮膚好乾, 皺哂皮, 不過我又冇喎.

如是者真係搞咗4年先好返哂, 雖然成副身家用哂喺醫生度, 毛孔粗哂, 但冇又紅又腫嘅暗瘡已經好開心, 冇留低火山洞亦非常感恩.