學化妝@Portfolio by Gary Chung & Eleena Yu

我未去Portfolio學化妝前, 都識基本嘅化妝技巧, 因為本身對化妝有興趣, 所以諗住再學得深入d, 閒時又可以賺下外快.

Portfolio有唔同嘅course, 我揀咗最多元化嘅創意造型化妝師 (MIC) Diploma 課程, 分3部份, 每星期上2.5hrs, total7-8個月. Part A教新娘妝 (搽粉, 遮瑕, 打陰影, 晝眉, 眼妝, 梳髻), Part B教唔同年代化妝, 古銅妝, color theory, 畫插圖同埋set頭, Part C教舞台妝, 噴槍妝, 面/身繪畫等.

Part A新娘妝考試 - 衫, 首飾, 頭飾都要自己準備

Part B唱片封套造型考試 - 自選一個造型跟住化得盡量神似.

整個假髮時有D狼狽, 因為要即席剪髮

一半課堂由Gary Chung教, 其他就Eleena負責. 每堂頭45分鐘會講解+示範, 其餘時間同學要搵朋友做model化返同一個妝, 最後再俾老師comment.  同學可以book時間返學校練妝, 由學校職員幫手睇個妝有冇改善地方. 表現好有機會out-job, 不過唔多.  每一part都有考試, 由學校搵model俾同學化指定主題嘅妝, 再由攝影師拍低照片, 曬好相老師會俾分, 之後同學可以拎返相片soft copy, 1張8F相(由學校揀), cert及reference letter. 雖然話就話係考試, 老師都會幫下眼, 幫你check完先影相. 我畢咗業3個多月, Part A及B的相已ready, 不過Part C重未有.

每Part都有一張cert, reference letter(有埋grade)同埋考試d相

學費一d都唔平, 要$40,000, 可以揀12個月分期付款.  其實香港都有好幾間化妝學校, 好多都有試讀, 試清楚係咪適合自己先報. 以下係我覺得Portfolio好及壞嘅地方:

+++++
1. 每人都會有一set免費掃(但竟然冇blush brush)
2. Gary Chung擅於分析輪廓, 好多tips真係唔講唔知, 一講就恍然大悟
3. 學校有提供化妝品(不過有些較舊), 唔駛一開始就買哂所有野
4. 每期exam的相片都影得好好, 可以擺落自己portfolio
5. 學嘅妝好多元化, 又有唔同theme

-----
1. 學費都真係幾貴
2. 上堂有機會遭人串, 並會聽到很多炫耀事蹟
3. 不是每個同學都有outjob機會